ایسے ہی چلتے چلتے 2011ء کا سال آگیا۔ میری فاروق بھائی سے شناسائی کو چار برس ہونے کو آرہے تھے۔ ایک دن یہ خوش خبری ملی کہ اپریل 2011 ء کے لاہور ایکسپو پر اٹلانٹس اورفاروق احمد آرہے ہیں۔ اور صرف یہ ہی نہیں،بلکہ اس سے بڑھ کر خود ہمارے محبوب مصنف جناب اشتیاق احمد بھی وہاں تشریف لارہے ہیں۔ یقینا یہ زندگی کی چند بڑی خوشی کی خبروں میں سے ایک خبر تھی۔ مجھے یقین نہیں آرہا تھا کہ میری اس دور کے اس عظیم مصنف اور ایسی کمال کی ہستی سے ملاقات ہونے جارہی تھی۔

آخر خدا خدا کر کے اتوار 10 اپریل 2011ء کا دن آیا اورمیں اپنے والد، بھائی اور بیٹے کے ہمراہ ایکسپوسنٹر کی جانب رواں ہوا۔ دھڑکنیں بے چین تھیں کہ ایک محبوب اورتاریخی شخصیت سے پہلی مرتبہ ملاقات ہونے جارہی تھی۔ ایکسپوسنٹر میں داخل ہوتے ہی نگاہیں انھیں ڈھونڈنے میں مصروف ہوگئیں، تیز تیز قدموں کے ساتھ اپنے باقی ہمراہیوں سے آگے آگے اٹلانٹس کے اسٹال کی تلاش میں چلنا شروع کیا اور آخر کار جلد ہی پرستاروں کے جھرمٹ میں اشتیاق احمد صاحب بیٹھے نظر آگئے۔ جب میں قریب پہنچا تو اچانک وہ تمام لوگ اِدھر اُدھر ہوگئے، یوں لگا کہ اللہ تعالیٰ نے میرے لیے خاص علیحدہ جگہ بناڈالی۔

ایک جانب سے فاروق بھائی مسکراتے آئے اور گلے لگا لیا۔ پھر میں اشتیاق احمد انکل سے بغل گیر ہوا۔ میرا تعارف فاروق بھائی نے فیس بک پیج کے سب سے مستقل اورمتحرک ممبر کی حیثیت سے کروایا جو میر ے لیے نہایت ا عزازکی بات تھی۔ فاروق بھائی اسٹال کی طرف چلے گئے اور میں اشتیاق انکل کے ساتھ بیٹھ گیا اور کئی منٹ تک باتیں ہوتی رہیں۔ میں گفتگو میں اتنا مدہوش تھا کہ باتوں کی تفصیل بھی یاد نہ رہی، مگر اتنا یاد ہے کہ باتیں میرے ناول”پُرخوف رات“کے پڑھنے سے لے کر ”عمران کی واپسی“ کی متوقع اشاعت تک بہت طویل تھیں۔ چھوٹے بھائی عدیل سے تصاویر لینے کا کہا تو یہ بھی یاد نہ رہا کہ محترم والد صاحب، بھائی اور فرزندکی بھی تصاویرلے لی جائیں،یہاں تک کہ آٹو گراف پر اپنا نام بھی جو کہ بجائے”عماد حسن“ کے”حماد حسن“لکھا گیا تھا، اس پر بھی غور نہ کیا۔
ملاقات کا نشہ ہی کچھ ایسا تھا، مگربھائی شہباز مرزا کے لیے آٹو گراف لینا نہیں بھولا تھا۔

اتنی دیر میں فاروق بھائی بھی واپس آگئے۔ مجھے آج بھی یاد ہے کہ اشتیاق انکل نے انہیں آتے دیکھ کر میرے پاس ہو کرزور سے کہا
”ان سے پوچھیں ”عمران کی واپسی“ کب شائع کررہے ہیں؟“         
میں نے فارروق بھائی کی طرف دیکھا تو وہ مسکرا کر بولے 
”ان شاء اللہ بہت جلد ایسا ہوگا۔“ 

اس کے بعد مزید پرستار آنا شروع ہوگئے اور میں نے بھاری دل سے ان دونوں سے اجازت لی۔ آج سوچتا ہوں کہ کاش اشتیاق انکل اور فاروق بھائی کواس دن اپنے گھرآنے کی دعوت بھی دے دیتا تو وہ ضرور قبول کرتے، مگر میں تکلف میں، کہ اتنے بڑے مصنف کہاں یہ مانیں گے ایسا نہ کہہ سکا۔ یہ پہلی اورآخری ملاقات ختم ہوگئی، مگر یہ وقت کو معلوم تھا کہ اس ملاقات کے اثرات نہ ختم ہونے والے ہوں گے اور خود میں ایک انجانی طاقت رکھنے ہوں گے۔

اس ملاقات سے اگلے روز یعنی 11 اپریل 2011 کو میری نئی ملازمت کا آغاز تھا۔ میں گذشتہ 4 برسوں میں بعض وجوہات کی بنا پر قریباً 12-10 ملازمتیں تبدیل کرچکا تھا۔ نئی ملازمت شروع ہوتے ہی میں کام میں مشغول ہوگیا اور ناولوں کا سلسلہ بھی جاری رہا۔
اسی دوران آنے والے ایک ناول کی جھلکیوں نے مجھے چونکا دیا۔ ناول کا نام تھا ”انجانی طاقت“ اور اس کے مرکزی کردار کا نام لکھا تھا۔ ”حمادحسن“ نہ جانے کیو ں مجھے یوں لگا کہ ہو نہ ہو، یہ کردار میرے نام پر لکھا گیا ہے۔

میں نے اسی وقت فاروق احمد کو فون ملایا اور ان سے پوچھا۔ انھوں نے کہا کہ وہ اس بارے میں اشتیاق انکل سے پوچھ کر بتائیں گے، لگتا تو ایسا ہی ہے۔ اگلے ہی روز ان کی پُرجوش کال آئی جس سے یہ بات کنفرم ہوگئی۔ میں نے ایک عجیب فرمائش کا اظہار کیا جو اشتیاق انکل نے فوراً ہی قبول کرلی۔ وہ فرمائش یہ تھی کہ جھلکیوں میں تو نام غلط آگیا، ناول میں اسے درست کر لیا جائے۔ لہٰذا آپ لوگوں کو ناول ”انجانی طاقت“ میں درست نام ”عماد حسن“ہی ملے گا۔

اس ناول کی کہانی کی بھی میرے ساتھ عجیب مماثلت تھی۔ حالاں کہ میں نے اس بارے میں کبھی بھی اشتیاق انکل سے تذکرہ نہیں کیا تھا، مگر حیرت انگیز طورپر ناول کے کردار ”عماد حسن“کا مسئلہ ملازمت کا تھا، وہ کسی جگہ زیادہ عرصہ ملازمت نہیں کرسکتا تھا اور آخر کار اس کا یہ مسئلہ حل ہو گیا تھا۔

آپ کو یاد ہوگا کہ میں نے بھی اس سے قبل چار سالوں میں دس سے بارہ ملازمتیں تبدیل کی تھیں، مگر حیرت انگیز طور پر 11 اپریل 2011ء کو شروع ہونے والی ملازمت آج بھی جاری ہے، بلکہ یہ میری زندگی کی طویل ترین ملازمت ہے اب تک۔ کیوں ہے نا حیرت کی بات؟ میں آج بھی اس اتفاقی مماثلت پر دنگ ہوں، واقعی اللہ تعالیٰ نے اشتیاق احمد رحمت اللہ کو بہت اعلیٰ صلاحیتیں عطا فرمائی تھیں۔
مزید ناول آرہے تھے، مگر رفتار بہت سست تھی، درمیان میں فاروق بھائی نے سلسلے کوپھر سے ختم کرنے کا ارادہ بھی کیا، مگر میری درخواست پر دوبارہ جاری کرنے پر راضی ہوگئے۔

میں اپنی شرمیلی طبیعت کی وجہ سے اشتیاق انکل سے براہ راست رابطہ نہیں کرتا تھا حالاں کہ فاروق بھائی نے مجھے ان کا نمبر تک دے دیا تھا۔ بس یہ سوچ تھی کہ کہاں وہ اور کہاں میں ناچیز۔ مگر شاید میں ان کے دل میں موجود تھا۔
انجانی طاقت کے بعد بھی میرا تذکرہ اس بات کا ثبوت ہے۔ ”آسمانی آوازیں“ (صفحہ 156) اورایک اورناول(جس کا نام اس وقت ذہن میں نہیں آرہا) میں بھی ”عماد حسن“ کاتذکرہ آپ احباب دیکھ سکتے ہیں۔

وقت کو قرار تو ہے ہی نہیں۔ 2015 ء کا سال آگیا۔ملاقات کو چار سال بیت گئے تھے۔ اس کے بعد نہ ہی فاروق بھائی لاہور ایکسپو آئے نہ ہی اشتیاق انکل۔ 2015 ء کے کراچی ایکسپو کو اس سال ایک ماہ قبل بجائے دسمبر کے نومبر میں منعقد کیا جارہا تھا۔
فاروق بھائی کے ساتھ رابطہ جاری تھا، خبر ملی کہ دو اہم باتیں ہو رہی ہیں۔ ناول ”عمران کی واپسی“ شائع ہورہا ہے اور اشتیاق انکل پُرزور اصرار پر کراچی تشریف لارہے ہیں۔ جب نئے آنے والے دُوسرے ناولوں کا علم ہوا تو تیسری اہم بات فاروق بھائی کو میں نے بتائی کہ اس طرح تو ”عمران کی واپسی“ ناول نمبر 800 بن جائے گا۔

ایکسپو شروع ہوا، میں فاروق بھائی سے تمام ناولوں پر اشتیاق انکل سے نام کے ساتھ آٹو گراف کی فرمائش کرچکا تھا اور اختر بھائی ایکسپو کے بعد میرا پارسل بھیجنے کا وعدہ۔ میں تصور میں ہی رہا کہ کیسے اشتیاق انکل اپنے 800 ویں ناول کو اپنی دیرنہ خواہش ”عمران کی واپسی“ کی صورت میں دیکھ رہے ہوں گے۔ ایکسپو ختم ہوگیا اورمیں انتظار میں تھا کہ اس دن اختر بھائی میرا آٹو گراف والا ناولوں کا سیٹ بھیجیں گے… مگر قدرت کو اس دن کوئی اور ہی خبر آنا منظور تھا۔

فیس بک کی ایک مخلص ساتھی اور دوست لبابہ علوی ہیں۔ مجھے اچانک ان کا میسج 17 نومبر 2017 ء کو موصول ہوا کہ اشتیاق احمد کا انتقال ہو گیا ہے۔ میں نے فوراً اس بات کو مسترد کر دیا۔ میں نے کہا کہ وہ تو کراچی ایکسپوپر ہیں اورمیں فاروق احمد کے ساتھ میں رابطے میں ہوں، یہ کوئی افواہ ہوگی۔ لبابہ نے کہا کہ کاش ایسا ہی ہوتا، مگر تم ٹی وی پر دیکھ لو۔ میں نے لیپ ٹاپ پر ٹی وی چینل لگایا تو واقعی یہ اندہوناک خبردرست نکلی۔ اس خبر کو دیکھ کر جو احساسات تھے، وہ قلم بند کرنے سے قاصر ہوں۔ خواہش کے باوجود جھنگ نہ جاسکا کہ جنازہ میں شرکت کرسکوں۔

کئی دن اس خبر کا اثر طبیعت پر رہا اور دل اُداس رہا۔ میں اشتیاق احمد انکل سے دوبارہ نہ مل سکا اور پھر کبھی اس دنیا میں نہ مل سکوں گا، یہ خیال ہی دل کو بے چین کیے ہوئے تھا۔ پھر ایک دن وہ مطلوبہ پارسل بھی موصول ہوگیا۔ ناولوں پر میرے درست نام کے ساتھ آٹوگراف بھی موجود تھے۔ کیسا عجیب احساس تھا، دستخط کرنے والا دُنیا سے جاچکا تھا اور مجھے یہ اب موصول ہورہے تھے۔
ان ناولوں کی ترتیب بناتے خیال آیا کہ دیکھوں تو کتنے ناول میری لائبریری میں موجود ہیں اور کتنے مسنگ ہیں۔ اس کے لیے اٹلانٹس کی ”میری کہانی“ کے آخر میں شائع شدہ فہرست کی مدد لی۔ اس تحقیق کے دوران اس فہرست میں کچھ جگہ بعض غلطیاں محسوس ہوئیں۔
فاروق احمد بھائی سے فون پر اس کے متعلق بات ہوئی تو کچھ باتوں کا ان کو بھی واضح علم نہیں تھا۔ میں ان دنوں ”اشتیاق احمد ناولزفینز ”نامی فیس بک پیج کا بھی ممبربن چکا تھا۔ اس فہرست کے بارے میں ان سے بھی بات چیت شروع ہوئی۔

میرا ہدف فہرست کی تصحیح و تکمیل اور اس کے مطابق تمام ناول اپنی لائبریری میں مکمل کرنا تھا۔ اس ہدف کے تعاقب میں فہرست میں بتدریج بہتری بھی ہو رہی تھی اور اس کے ساتھ ساتھ جو ناول کتابی شکل میں لائبریری میں موجود نہیں تھے، ان کی ڈاؤن لوڈنگ بھی جاری تھی۔ میں اس سوچ میں تھا کہ بالفرض اگر ناول کتابی صورت میں نہ بھی مکمل ہوسکیں تو کم از کم پی ڈی ایف میں تو ضرور موجود ہونے چاہییں۔

اس تلاش و تحقیق کے دوران ”اشتیاق احمد ناولز فینز“ پر کچھ خاص نمبر اور دوسرے ناول ایسے ملے کہ جن کے مسنگ صفحات الگ سے پیج پر لگائے گئے تھے اور کچھ ناولوں کے صفحات آگے پیچھے بھی تھے۔ میں نے ان کو مکمل کرکے اور ترتیب میں لا کر پیج کے ایڈمن کو بجھوائے۔ چند ہی ناولوں کی درستگی کے بعد پیج کے بانی ایڈمن جنید علی نے میرے کام سے متاثر ہو کر مجھے اعزازی طورپر اس پیج کا ایڈمن ہی بنا دیا۔

یہ ایک اوربہت بڑا اعزاز تھا جس نے مجھے کچھ کر گزرنے کے لیے سوچنے پر مجبور کر دیا اور میں ایک اور راہ کی طرف گامزن ہوا۔ وہ سوچ یہ تھی کہ فہرست کی تشکیل و ترتیب کے ساتھ ساتھ، تمام آنے والی نسلوں کے لیے اشتیاق احمد رحمت اللہ کے تمام ناول ہمیشہ ہمیشہ کے لیے محفوظ کردئیے جائیں۔اس کام کیلئے سب سے پہلے معاون ایڈمن احباب اور ممبران کے ساتھ مل کر پیج پر موجو دناولوں کی ایک فہرست بنائی۔ معلوم ہوا کہ قریباً ڈھائی سو ناول ایسے ہیں جو کہ پی ڈی ایف میں دستیاب نہیں ہیں۔
اس فہرست کے مطابق اپنی لائبریری میں ناول تلاش کیے۔ قریباً پچاس کے قریب ناول میرے پاس موجود تھے۔ باقی دو سو کے قریب ابھی تلاش کرنا تھے جن میں متفرق کتب بھی شامل تھیں۔